Бірнеше күн бойы Қазақстанның Оңтүстік, Солтүстік, Шығыс және Батыс өңірлерінен келген 100-ге жуық жас футболшы матчтарда өз шеберліктерін көрсетіп, 20-ға жуық маманның жетекшілігімен қарқынды оқу-жаттығу жиындарынан өтті. Жобаның басты мақсаты – тек жарыс өткізу ғана емес, сонымен бірге болашағынан үміт күттіретін жас спортшылардың техникалық дайындығын кешенді түрде бақылау, бағалау және олардың әлеуетін ашу.
Турнир қорытындысы бойынша бапкерлер штабы Қазақстан WU-15 қыздар құрамасының жақын арадағы құрамын жасақтайды. Өздерін үздік қырынан көрсете білген футболшылар ағымдағы жылдың тамыз айында өтетін «Даму Кубогы» халықаралық турниріне қатысу үшін ұлттық құрамаға шақырту алады.